Палітык і грамадзкі дзеяч Вячаслаў Сіўчык асуджаны на 15 сутак адміністрацыйнага арышту. Такое рашэньне 23 красавіка прыняў раённы суд у Старых Дарогах.

Вячаслаў Сіўчык, які ўзначальвае мемарыяльнае адзьдзяленьне “Беларускага добраахвотнага таварыства аховы помнікаў гісторыі і культуры”, быў затрыманы 23 красавіка каля будынка суда Маскоўскага раёну г. Менска супрацоўнікамі міліцыі Старых Дарог. Яны даставілі грамадзкага дзеяча ва ўпраўленьне ўнутраных справаў раённага цэнтру, дзе прад'явілі абвінавачаньне ў правапарушэньні па арт. 23.34 Кодэкса аб адміністрацыйных правапарушэньнях (парушэньне парадку арганізацыі або правядзеньня масавага мерапрыемства або пікетаваньня). Пасьля таго як В.Сіўчык даў у міліцыі тлумачэньні, яго накіравалі ў суд.

Абвінавачаньне зьвязана з устанаўленьнем 19 красавіка мемарыяльнага крыжа ў вёсцы Дражна Старадарожскага раёну ў памяць аб мірных жыхарах, зьнішчаных партызанамі 15 красавіка 1943 года. Шасьціканечны крыж сьвятой Эўфрасіньні Полацкай, нябеснай заступніцы Беларусі, устаноўлены побач з каталіцкімі могілкамі вёсцы, частка якой была спалена, а многія жыхары забіты або спалены партызанамі ў сваіх дамах.

У адкрыцьці знака ўдзельнічала больш за 30 чалавек, у тым ліку жыхары вёскі і сьведкі трагедыі. Перад пачаткам устаноўкі крыжа да могілак пад'ехалі прадстаўнікі мясцовай улады, у тым ліку спэцслужбаў, міліцыі, ідэалягічнага адзьдзелу Старадарожскага райвыканкаму, якія спрабавалі перашкодзіць устанаўленьню знака. Аднак цырымонія яго адкрыцьця ўсё ж адбылася. 23 красавіка зьявілася інфармацыя, што помнік дэмантаваны.

Паводле радыё Рацыя