Reply to comment

Стваральнік ініцыятывы «Гуманітарны маршрут Беларусь – АТА» гамяльчук Андрэй Стрыжак узнагароджаны ганаровай граматай амбасады Ўкраіны ў Беларусі.

Таксама ўкраінская амбасада ўшанавала і іншых валанцёраў ініцыятывы «Гуманітарны маршрут Беларусь – АТА».

У выступе ва ўкраінскай амбасадзе ў Менску Андрэй Стрыжак адзначыў, што яго дапамога ўкраінцам пачалася яшчэ ў часы Еўрамайдану, калі ён працаваў на гарачай лініі валанцёрскай ініцыятывы «Еўрамайдан-SOS».

Потым, калі ўжо пачалася вайна на Данбасе, з'явілася ідэя займацца гуманітарнай дапамогай у зоне ваеннага канфлікту.

«Наш галоўны накірунак – дапамога людзям, якія знаходзяцца ў зоне канфлікту. Акрамя таго, мы таксама дапамагаем медыкам, якія працуюць у зоне канфлікту», – апавёў Стрыжак.

Часовы павераны ў справах Украіны ў Рэспубліцы Беларусь Валер Джыгун падзякаваў беларускім валанцёрам:

«Цяпер Украіна перажывае няпросты час. Стаіць пытанне пра тое, каб адстаяць суверэнітэт і незалежнасць. І вельмі прыемна, што зараз разам з нашымі патрыётамі беларускія сябры, валанцёры».

Паводле Радыё Свабода.