Reply to comment

Прадстаўнікі шэрагу дэмакратычных арганізацый зладзілі ля будынку Мінгарсуда чарговы яскравы пікет у падтрымку блогера і рэдактара антыімперскага сайта 1863х.com

У акцыі ўдзельнічалі лідары Маладога фронту і БХД, прадстаўнікі Руху “За Свабоду”, руху салідарнасці “Разам”, “Еўрапейскай Беларусі” ды іншыя неабыякавыя людзі.

Яны трымалі бел-чырвона-белыя сцягі і гучна скандавалі лозунгі падтрымкі: “Жыве Беларусь!”, “Свабоду!”, “Не быць скотам!”, “Верым! Можам! Пераможам!”, “Эдуард! Мы з табой! Не здавайся! Ты — герой!”, “Эдуарду Пальчысу свабоду!”, “Дайце волю і свабоду беларускаму народу!”, “Патрыятызм — не экстрымізм”.

Нягледзячы на тое, што на вуліцы ліў дождж, а на ўдзельнікаў акцыі складаліся адміністрацыйныя пратаколы (агулам за усе дні пікетавання складзена блізу 70 пратаколаў), настрой грамады быў баявы. Прыхільнікі Эдуарда ўпэўненыя, што словы, якія добра чуваць у залі суда, будуць моцнай маральнай падтрымкай Эдуарду Пальчысу, які знаходзіўся ў той момант на лаве падсудных.

Пракурор у заключным слове запрасіў 3 з паловай гады зняволення для Эдуарда Пальчыса. Абвяшчэнне прысуду прызначана на 28 кастрычніка.

Нагадаем, стваральніка сайта 1863х.com, на якім змяшчаліся матэрыялы з негатыўнай ацэнкай вялікаімперскай палітыкі Расіі, Эдуарда Пальчыса вінавацяць у распальванні варожасці па прыкмеце расавай, нацыянальнай, рэлігійнай, моўнай ці іншай сацыяльнай прыналежнасці (ч. 1 арт. 130 КК), а таксама ў вырабе і распаўсюдзе парнаграфічных матэрыялаў (арт. 343 КК). Пальчыс быў затрыманы ў Расіі, потым перададзены ў Беларусь, і ўжо 9 месяцаў, колькі ішло следства, знаходзіцца за кратамі. Праваабаронцы прызналі Эдуарда Пальчыса палітзняволеным.