Начны арышт маладафронтаўца

Уначы ў Гомелі на чыгуначным вакзале міліцыя затрымала актывіста незарэгістраванай арганізацыі “Малады фронт” Андруся Цянюту. Пра гэта Андрусь пасьпеў паведаміць праз мабільны тэлефон сваім знаёмым.
Хлопца даставілі ў Чыгуначны райаддзел унутраных спраў, дзе прад'явілі прэтэнзіі, што ён не зьяўляецца ў міліцыю й суд па позвах.

А палове на пятую гадзіну раніцы Андрэя Цянюту адвезьлі ў ізалятар часовага ўтрыманьня на вуліцу Барысенкі, дзе ён знаходзіцца й цяпер.

На сёньня ў Чыгуначным судзе Гомеля прызначаны разгляд некалькіх адміністрацыйных пратаколаў супраць Цянюты, у прыватнасьці, за нецэнзурную лаянку й супраціў міліцыі.

13 верасьня, калі сьвяткаваўся Дзень гораду, міліцыя затрымала Андруся Цянюту зь бел-чырвона-белым сьцягам блізу Лядовага палацу, дзе ладзіўся канцэрт. Падчас затрыманьня хлопцу вывіхнулі палец і пашкодзілі калена. Сам ён нібыта пляваў на міліцыянтаў і хістаўся.

Сьвяточную ноч спадар Цянюта правёў у міліцыі на бетоннай падлозе. Раніцай яго адпусьцілі на лекаваньне з прыкметамі пнэўманіі. Цяпер – зноў затрымалі.

Паводле радыё Свабода