Растаптаны гонар Яні Паляковай (абноўлена)

Яня Палякова была эмацыйна няўстойлівым чалавекам. Чаму такога чалавека судзілі? Чаму такога чалавека цкавалі ў «СаўБеліі»?

Уся лукашэнкаўская сістэма палітычных рэпрэсій мае на мэце не фізічнае вынішчэнне апанентаў, а таптанне іх гонару. Збэшчаныя, яны будуць самі сабе агідныя, і апусцяць рукі.

Суды за «лаяўся матам», за сімку ад мабільніка… Гэтая сістэма стала канвеерам, тысячы людзей праз яго прапусцілі.

Банальныя словы рэжуць нажом, калі чалавек сыходзіць, але тут не скажаш іначай: Палякова – ахвяра сістэмы. Такая ж ахвяра, як Карпенка ці Ганчар. Яна з таго ж пакутніцкага шэрагу, што і калгаснікі, якія співаюцца і лезуць у пятлю ад безвыходнасці, ад уласнай убогасці побач з мэрсэдэсамі тых, каму на гэтым свеце добра жыць. Кожны з іх гіне па‑свойму, але ўсе ад аднаго і таго ж. Ад растаптанасці на гэтым свеце, у гэткім укладзе.

Моцныя, як Аляксей Шыдлоўскі ці Эніра Браніцкая, выходзяць з судоў пераможцамі.

Палякова была зусім іншым чалавекам. Яна не вынесла сутыкнення з сістэмай.

Яе мала ведалі, яе мала слухалі, а яна таксама плакала за сваю Беларусь, як яна яе разумела, за сваё жыццё, як яна яго разумела.

І Беларусь плача сёння за 33‑гадовую Яню Палякову, як за кожнага калгасніка плача, як за кожную безымянную магілку на бяскрайніх Паўночных могілках, як плача за свой растаптаны гонар. Там, дзе слёзы ўпадуць, там дубы прарастуць.

***

У Салігорскай пракуратуры яшчэ не завершаная праверка па факце самагубства праваабаронцы Яны Паляковай. Пра гэта паведаміла кіраўніца прэсавай службы Менскай абласной пракуратуры Тацяна Калініна.

“Сёньня, 17 сакавіка, заканчваецца 10-дзённы тэрмін, адведзены на праверку. Але яшчэ рашэньне не прынятае. Пра вынік праверкі паведамім заўтра, 18 сакавіка”, — сказала “Свабодзе” Тацяна Калініна.

Нагадаем, праваабаронца Яна Палякова скончыла жыцьцё самагубствам у ноч на 7-га сакавіка ў сваёй кватэры ў Салігорску. За 3 дні да таго Салігорскі суд прызнаў жанчыну вінаватай у ілжывым даносе на супрацоўніка міліцыі і асудзіў на 2,5 года “хіміі”. Яна Палякова вінаватай сябе не прызнала і пасьля суду сказала знаёмым, што “ніколі ня будзе зэчкай”. Пра перадсьмяротную запіску Яны Паляковай нічога не вядома.

На пахаваньні Паляковай прадстаўнікі грамадзкасьці запатрабавалі расьсьледаваньня прычын яе сьмерці пракуратурай. У пракуратуры Салігорску праверка па факце самагубства Яны Паляковай пачалася 7 сакавіка. Пра падрабязнасьці праверкі ў пракуратуры гаварыць адмаўляюцца.

“Гэта стандартная праверка, якая праводзіцца пасьля кожнага самагубства. Разглядаецца магчымасьць давядзеньня да самагубства, і калі гэта пацьвярджаецца, то заводзіцца крымінальная справа”, — казаў прадстаўнік пракуратуры Беларусі.

Былы міліцыянт Віктар Пугачоў, які заявіў у судзе, што не зьбіваў Яну Палякову, а яна пра гэта нібыта схлусіла, адмаўляецца камэнтаваць падзеі, якія адбыліся пасьля суду.

Паводле Нашай Нівы, Радыё Свабода