НЕБЯСПЕЧНАЯ СУДОВАЯ ПРАКТЫКА

Беларускія грамадзяне, звяртаючыся ў суд, мала спадзяюцца на справядлівасць, асабліва калі гэта закранае інтарэсы дзяржавы  ці асобных дзяржаўных службоўцаў.
Малады хлопец Цімафей Атрошчанкаў, адбыўшы   адміністрацыйнае  пакаранне  ў Цэнтры ізаляцыі правапарушальнікаў  на вул. Акрэсьціна, Звярнуўся ў суд Маскоўскага раёна горада Мінска з позвай аб матэрыяльнай кампенсацыі маральнай шкоды.
Справа ў тым, што пасля  арышту ў яго пачаліся болі ў спіне, ён звяртаўся ў медыцынскі цэнтр да неўрапатолага, які паставіў дыягназ "вертэбрагенная люмбалгія, устойлівы ўмераны болевы і рэфлекторна-танічны сіндром."
У сваёй пазоўнай заяве Цімафей пералічыў не толькі  шкоду здароўю, прычыненую падчас адбывання адміністрацыйнага арышту, але і маральныя пакуты, перажытыя за 9 сутак у перапоўненай камеры, пры нізкай тэмпературы, без пасцельнай бялізны і свежага паветра.
Пазоў разглядала суддзя суду Маскоўскага раёна Мінска - Рудніцкая Е.Б., якая вынесла пастанову, што гэтая справа непадведамасная суду.
На просьбу камітэта абароны рэпрэсаваных “Салідарнасьць” праваабаронца Сяргей Усцінаў пракаментаваў гэтую пастанову:
- На мой погляд,   яна супярэчыць нацыянальнаму заканадаўству, бо права грамадзяніна на матэрыяльную кампенсацыю  шкоды гарантуецца арт. 60 Канстытуцыі Рэспублікі Беларусь, і з'яўляецца спосабам абароны грамадзянскіх правоў. Справы аб матэрыяльнай  кампенсацыі маральнай шкоды разглядаюцца толькі ў грамадзянскім судаводстве. І небяспека такіх пастановаў  у тым, што чалавека пазбаўляюць права доступу да суду.
Трэба адзначыць, што суды не першы раз выносяць такія пастановы. Так яны выпрацоўваюць небяспечную судовую практыку - адмаўляць грамадзянам у правасуддзі.
 Кампенсаванне за парушанае права з’яўляецца адным з крытэраў эфектыўнага сродку прававой  абароны,    што прадугледжана падпунктам (а) пункта 3 артыкула 2 Міжнароднага Пакта аб грамадзянскіх і палітычных правах.
 Нягледзячы  на тое, што Цімафея гэтага права пазбавілі, мы будзем абскарджываць  гэтую пастанову і спадзяемся, што вышэйшыя суды адменяць яго і мы зможам давесці, што хлопцу была прычыненая шкода.