“Маўклівыя” карціны замест “маўклівых” акцый

У Н’ю-Ёрку адбываецца мастацкая выстава “Sound of silence: Art During Dictatorship”(“Гучанне маўчання: мастацтва пад час дыктатуры “), прысвечаная мастацкай інтэрпрэтацыі грамадскіх і палітычных падей у сучаснай Беларусі.. Адным з удзельнікаў стаў  студэнт  праграмы Каліноўскага, мастак Яўген Шадко.

- Пра мажлівасць паўдзельнічаць у гэтай выставе даведаўся праз інтэрнэт. Сябр даслаў на паштовую скрынку інфармацыю пра праэкт "Sound of silence: Art During Dictatorship", дзе прайсьці адбор і паўдзельнічаць прапаноўвалася кожнаму ахвотнаму. Што тычыцца сутнасці выставы, то тут назоў усё кажа сам за сябе.  На мой погляд,  мастацтва пад час дыктатуры – гэта калі ты не заплюшчваеш   вочы   на тое, у якой прасторы  жывеш , а спрабуеш  інтэрпрэтаваць сітуацыю. Можна ўзгадаць маўклівыя акцыі, якія перашкаджалі нашай “стабільнасці” ды параўнаць іх з “маўклівымі” карцінамі, на якія непажадана глядзець беларусам.

Нажаль, я быў абмежаваны ў выбары  маіх прац з-за іх памераў, таму атрымалася даслаць усяго дзве карціны.


Адна з іх мае назоў "Меланхолія". Меланхолія як паветра,  якое непрабіўнай сцяной навісла над намі, гэта чаканне пераменаў,  якое ператвараецца ў штодзённасць.Ключом да разгадкі гэтай маўклівай драмы на карціне служыць выява З.Дашкевіча, які да сённяшняга часу знаходзіцца ў зняволенні.

Другую  карціну я назваў "Наступны". Наступным будзе твой “фрэнд з фэйсбука” ці сябра з “вкантакце”, які зменіць аватарку на выяву з мэсэджам ці на чорны квадрат. Гэта мастацкая інтэрпрэтацыя  той  рэакцыі, якую заўважаю ў сацыяльных сетках пасля сумных падзей: выбараў, выбуху ў метро, пасля затрыманняў.  Людзі імкнуцца падзяліцца з дапамогаю аватара сваімі пачуццямі.

У дадзеным праекце, куратарам якога з’яўляецца Вольга Капенкін, меў магчымасць паўдзельнічаць кожны мастак з Беларусі.


Выстава працягнецца да 10 сакавіка. У межах выставы мае адбыцца дыскусія аб сучасным становішчы ў Беларусі.