Жонка прэзідэнта Польшчы правяла сустрэчу салідарнасьці з жонкамі палітвязняў

Жонкі беларускіх палітзняволеных Наталля Пінчук, Марына Адамовіч і Наста Дашкевіч днямі сустрэліся з Ганнай Камароўскай, жонкай прэзідэнта Польшчы Браніслава Камароўскага. Пад час сустрэчы пані Камароўская запэўніла, што польскі ўрад не застаецца абыякавым да лёсаў палітзняволеных і прыкладае намаганні для іх вызвалення. Гэтаксама як і жонкі Алеся Бяляцкага, Міколы Статкевіча і Змітра Дашкевіча, пані Камароўская чакала з турмы мужа, арыштаванага камуністычнымі ўладамі ў 1980 годзе за падрыхтоўку маніфестацый, таму добра разумее ўсю складанасць становішча.

«Вельмі важная сустрэча на такім высокім узроўні. Ганна Камароўская добра памятае тыя часы, калі Польшча сама змагалася з дыктатурай. Гэта тая жанчына, якая разумее нас як палітычна, так і па-жаночаму. Мудрая, узважлівая, прыгожая, чуллівая. Першая лэдзі і маці 5 дзетак. Тая, хто таксама ў свой час чакала мужа з турмы. Адным словам Жанчына з вялікая літары», — падзялілася ўражаннем ад сустрэчы Наста Дашкевіч.