Ахова парадку на мітынгах – клопат уладаў

Гэта вынікае з адказу Брэсцкага аблвыканкама, куды праваабаронцы звярталіся з праблемай неадпаведнасці рашэння Бярозаўскага райвыканкама пастанове Савета Міністраў №207.

Намеснік старшыні аблвыканкама Леаніда Цупрыка паведамляе, што райвыканкаму дадзена даручэнне прывесці іх рашэнне ў адпаведнасць з пастановай СМ.

Нагадаем, згодна з пастановай Савета Міністраў №207 ад 5 сакавіка 2012 года, мясцовы выканаўчы орган павінен сам звяртацца ў міліцыю наконт аховы правапарадку на масавым мерапрыемстве, атрымаўшы заяву. Праваабаронцы спадзяюцца, што зараз звыклая спасылка чыноўнікаў на тое, што заяўнікі не маюць дамовы з міліцыяй, не будзе з’яўляцца падставай для забароны пікетаў.

Па матэрыялах spring96.org