Дэкрэт №5 у дзеянні

Як паведаміў сябра незалежнага прафсаюза, былы работнік Бабруйскага завода трактарных дэталяў і агрэгатаў Аляксандр Баранкін, на прадпрыемстве звольнілі работніцу пенсійнага ўзросту праз два тыдні пасля падаўжэння працоўнага кантракту на год.

“Дэкрэт №5 накіраваны на пагаршэнне ўмоў працы і абмежаванне правоў працоўных. Цяпер у кіраўніка прадпрыемства з’явілася намнога болей магчымасцяў звольніць няўгоднага работніка незаслужана. І хаця гэты дэкрэт таксама абавязвае кіраўнікоў выплачваць заробак своечасова, зусім нядаўна на заводзе ТДА яго затрымалі. Мусілі выдаць 25-га, студзеня, а выдалі 27-га. Маёй жонцы давялося даплаціць 120 тысяч пені за пратэрміноўку аплаты камунальных паслугаў”, – распавёў Аляксандр Баранкін.

Паводле спадара Аляксандра на заводзе, дзе ён раней працаваў, зусім нядаўна адбыўся абуральны выпадак: работніца пенсійнага ўзросту Тамара Васільеўна прыйшла на працу праз 2 тыдні пасля падаўжэння кантракту на 1 год. “Вы ад сёння не працуеце”, – паведаміў ёй начальнік цэха. “Як так? У мяне ж кантракт на год падпісаны!”. “Можаце яго пакласці куды падалей, бо мы можам звальняць людзей згодна з новым дэкрэтам за 7 дзён”.

Даведка:

Дэкрэт № 5, выдадзены кіраўніком дзяржавы, істотна парушае правы працоўных. Згодна з ім дазваляецца пагаршэнне ўмоў працы работніка з паведамленнем яму пра гэта ўсяго за сем дзён, спрошчана працэдура ўтрымання часткі заробку за нанесены ўрон прадпрыемству, дэпрэмавання, адхілення ад працы і датэрміновага скасавання кантрактаў.