Мінскія ўлады перадумалі дазваляць правядзенне з'езду БХД

Пакуль з розных установаў Мінска беларускім хрысціянскім дэмакратам працягваюць паступаць адмовы на звароты з просьбай надаць памяшканне для правядзення ўстаноўчага з'езду БХД 13 чэвреня, прыйшоў адказ і з Менгарвыканкаму на просьбу паспрыяць у пошуку памяшкання.

«Пошук памяшканняў для такіх мерапрыемстваў не ўваходзіць у кампетэнцыю Мінскага гарвыканкама», – гаворыцца ў адказе за подпісам намстаршыні Ігара Карпенкі.

Разам з тым у 2011 годзе Менгарвыканкам дазваляў правядзенне ўстаноўчага з'езду БХД у канкрэтным памяшканні – Палацы культуры МТЗ, належачым УП «Культсэрвіс МТЗ».

Што змянілася ў заканадаўстве Беларусі за чатыры гады, не зразумела.

"БХД – адзіная хрысціянска-дэмакратычная партыя Еўропы, якая не мае рэгістрацыю. Мы рыхтуем звароты да хрысціянскіх дэмакратаў Еўропы аказаць ціск на ўлады Беларусі, каб яны не перашкаджалі прадстаўленню памяшкання і гарантавалі права на свабоду асацыяцый”, - паведаміў адказны сакратар аргкамітэту БХД Дзяніс Садоўскі.

У той час як афіцыйныя мерапрыемствы і з’езды праўладных арганізацый заўсёды праходзяць без праблемаў, НДА і апазіцыйныя палітычныя партыі рэгулярна сутыкаюцца з праблемай пошуку буйных памяшканняў для правядзення сваіх мерапрыемстваў, што з’яўляецца прыкметай дыскрымінацыі паводле палітычных поглядаў і перакананняў.