Пасля пераводу у калонію ў Горках Мікалай Дзядок спазнаў моцны ціск, які можна расцэньваць як катаванні

На другі дзень пасля пераводу, 13 мая ён быў змешчаны ў штрафны ізалятар, дзе правёў 5 сутак. Літаральна праз дзень, 19 мая, яго зноў адправілі у адзіночку штрафнога ізалятара, дзе было надзвычай холадна.

Юнак пакутаваў усю ноч і раніцай 20 мая у адчаі нанёс сабе рэзаныя раны жывата і рук, пасля чаго быў змешчаны ў медсанчастку. Пасля аказання першай медычнай дапамогі, Мікалая Дзядка ізноў накіравалі ў тое ж халоднае памяшканне ШІЗА, дзе ён і знаходзіўся да 26 мая.

“Гэта сведчыць, па-першае, аб тым, што на Мікалая Дзядка, як на палітвязня, ажыццяўляецца ціск - у кантэксце апошніх падзей, калі мы назіраем ўзмацненне ціску на ўсіх палітвязняў: і на Юрыя Рубцова, і на Мікалая Статкевіча, і на ўсіх астатніх. Па-другое, гэта сведчыць аб тым, што наша пенітэнцыярная сістэма не зжыла гэтых элементаў таталітарнага мінулага. Ўмовы ўтрымання ў ШІЗА практычна невыносныя для людзей”, - пракаментаваў сітуацыю “Хартыі97” намеснік старшыні Праваабарончага цэнтра "Вясна" Валянцін Стэфановіч.

Мікалай Дзядок адбыў 4,5 гады зняволення за нібыта хуліганскія дзеянні ў дачыненні да афіцыйных будынкаў і павінен быў выйсці на волю 3 сакавіка 2015 года. Аднак 26 лютага суд Ленінскага раёна Магілёва асудзіў палітвязня па артыкуле 411 Крымінальнага кодэкса «злоснае непадпарадкаванне патрабаванням адміністрацыі» да 1 года зняволення ў калоніі строгага рэжыму. 30 красавіка суд касацыйнай інстанцыі пакінуў гэты прысуд у сіле, нагадвае spring96.org.

Даслаць ліст падтрымкі Мікалаю можна на адрас:

213410, г. Горкі, вул. Дабралюбава, 16 (ПК № 9)