У Гомелі затрымалі актывіста з надпісам «За Беларусь без Лукашэнкі»

Затрыманне актывіста Аб'яднанай грамадзянскай партыі Уладзіміра Няпомняшчых правялі невядомыя ў цывільным на вуліцы Перамогі. Актывіст быў апрануты ў саколку з надпісам «За Беларусь без Лукашэнкі», якую, дарэчы, ён носіць рэгулярна.

Прыкладна ў гэты ж час у Гомелі на чыгуначным вакзале знаходзіўся Аляксандр Лукашэнка, які сёння наведвае горад над Сожам з рабочым візітам. Хутчэй за ўсё, з візітам дыктатара і звязана затрыманне актывіста АГП.

Уладзімір Няпомняшчых быў дастаўлены ў АУС Чыгуначнага раёна Гомеля, паведаміў БелаПАН намеснік старшыні АГП Васіль Палякоў. Паводле яго слоў, ніякіх працэсуальных дзеянняў з затрыманым не праводзяць, ён знаходзіцца ў аддзяленні міліцыі з мэтай прэвентыўнай ізаляцыі.