Reply to comment

Традыцыйны калектыўны велазаезд 29 красавіка (так званая “Крытычная маса”), які ладзіцца кожны год у знак адкрыцця роварнага сезона, быў сёлета азмрочаны прыкрым інцыдэнтам з удзелам беларускіх праваахоўнікаў.

Міліцыянты сачылі за раварыстамі ад старту “Крытычнай масы” (ганак тэатра Оперы і Балета”) да скрыжавання пр. Пераможцаў і пр. Машэрава. У раёне стэлы ў гонар Перамогі аўтобус з АМАПам падрэзаў калону раварыстаў. Міліцыянты пачалі хапаць раварыстаў і закідваць іх у аўтобус. Затрыманых паклалі на падлогу і прыціснулі зверху іх жа роварамі. На спробы затрыманых размаўляць адказвалі ударамі.

На схопленых раварыстаў у Цэнтральным УУС аформілі адміністрацыйныя пратаколы. Паводле неафіцыйнай інфармацыі, ў дачыненні да Станіслава Канавалава і Дзімтрыя Паліенкі узбудзілі крымінальныя справы паводле ч.2 арт. 339 Крымінальнага кодэксу - "Хуліганства, здзейсненае паўторна, альбо групай асоб, альбо звязанае з супрацівам асобе, якая спыняе хуліганскія дзеянні, альбо спалучанае з прычыненнем менш цяжкага цялеснага пашкоджання".

На афіцыйнай старонцы ГУСС паведамляецца, што ў раёне стэлы «Мінск - горад-герой» група веласіпедыстаў, груба парушаючы патрабаванні Правіл дарожнага руху, выехала на праезную частку. Пры спробе спыніць супрацьпраўныя дзеянні і вярнуць іх на тратуар, парушальнікі правапарадку аказалі непадпарадкаванне законным патрабаванням супрацоўнікаў міліцыі.

Насамрэчы цалкам верагодна, што нервовую рэакцыю міліцыянтаў выклікаў удзел у велапрабегу некаторых грамадскіх актывістаў і выкарыстанне, паводле звестак міліцыі, чорна-зялёнай сімволікі экалагічнага крыла анархістаў.

Камітэт “Салідарнасць” лічыць, што відавочнае перадузятае стаўленне міліцыі да непадкантрольных грамадскіх арганізацый і жорсткі пераслед іх актывістаў з’яўляецца дыскрымінацыйным і недапушчальным у цывілізаваным грамадстве.