Reply to comment

На восьмы дзень абароны Курапатаў стала вядома, што рабочыя, якія збіраліся будаваць офісны цэнтр ля Урочышча, забралі рэчы. Работы прыпыніліся. Шматдзённая вахта абаронцаў Курапат прынесла тактычную перамогу.

Нагадаем, з мінулага панядзелка на тэрыторыі у непасрэднай блізкасці ад мемарыяльнага комплексу, дзе падчас бальшавіцкага тэрору па самых сціплых ацэнках былі расстраляныя дзясяткі тысяч чалавек, у аўральным парадку, былі распачатыя падрыхтоўчыя да будаўніцтва працы. Кампанія «Белрэканструкцыя» распачала будаўніцтва пяціпавярховага бізнес-цэнтра.

Актывісты Маладога фронту першыя ўсталі на абарону Курапатаў, спрабуючы фізічна супрацьстаяць будаўнікам. У хуткім часе да абароны месца пахавання ахвяраў сталінскіх рэпрэсій далучыліся іншыя грамадскія і палітычныя арганізацыі. Было праведзена экстранае паседжанне Камітэту абароны Курапатаў, на якім вызначылі канкрэтны алгарытм дзеянняў. Рабіліся звароты у пракуратуру і Мінгарвыканкам, была арганізаваная кругласуткавая вахта абаронцаў Курапатаў каля будпляцоўкі, сярод жыхароў суседніх дамоў праводзілася інфармацыйна-асветніцкая праца. У намётавым лагеры спявалі музыкі, ладзіліся інсталяцыі, праводзіліся супольныя малітвы, паказвалі дакументальныя стужкі, прысвечаныя Курапатам. На сайце petitions.by створана петыцыя "Неадкладна спыніць будаўніцтва бізнес-цэнтра каля мемарыяла Курапаты!"

Урэшце ўлады прынялі рашэнне прыпыніць працы каля Курапатаў да высвятлення, наколькі законна быў выдзелены ўчастак пад будаўніцтва бізнес-цэнтра.

Можна заўважыць, што мы сталі сведкамі перамогі сапраўднай салідарнасці, калі актывісты самых розных грамадскіх і палітычных арганізацый, жыхары шматпавярховых дамоў аб’ядналіся і далі адпор рэалізатарам бязглуздай і амаральнай ідэі будаўніцтва бізнес-цэнтра на костках закатаваных і расстраляных ахвяраў таталітарнага рэжыму.