Суд над Максімам Дашуком 1 чэрвеня

Прызначаная дата суду над удзельнікам «Працэсу чатырнаццаці» непаўналетнім Максімам Дашуком. Суд пачнецца ў дзень абароны правоў дзяцей 1 чэрвеня ў судзе Маскоўскага раёну. Пачатак а 14:15.

Пра гэта «НН» паведаміў адвакат Павел Сапелка.

Супраць Максіма Дашука была заведзеная крымінальная справа паводле артыкулу 415 КК («Ухіленне ад адбывання пакарання ў выглядзе абмежавання волі»). У траўні летась Максім быў асуджаны на паўтара году абмежавання волі без накіравання ў спецкамендатуры, так званай «хатняй хіміі».

Праз свой узрост і адсутнасць мінскай прапіскі хлопец так і не змог уладкавацца на працу, таму фактычна знаходзіўся пад хатнім арыштам. З дому яму дазвалялася выходзіць толькі на дзве гадзіны ў суткі — ад дзесятай да дванаццатай раніцы.

Вясной у Максіма памёр бацька, таму яму часта даводзілася дапамагаць маці, якая працуе прадпрымальніцай. Міліцыянты вынеслі Дашуку чатыры папярэджанні. Адну ноч хлопец правёў у следчым ізалятары, пасля чаго пракурор памяняў меру стрымання на падпіску аб нявыездзе.

Некалькі дзён таму міжнародная праваабарончая арганізацыя Amnesty International прызнала фігурантаў «справы 14‑ці» вязнямі сумлення.

Паводле nn.by