Улады вырашылі зачыніць "Віцебскі кур'ер"

Віцебскі аблвыканкам адклікаў свой дазвол на перарэгістрацыю ЗАТ “Выдавецкі дом “Віцебскі кур’ер”, які даваў у кастрычніку бягучага году. Прычынамі названыя адсутнасьць узгадненьня “зь мясцовым выканаўчым і распарадчым органам”, неадпаведнасьць памяшканьня, а таксама неадпаведнасьць “патрабаваньням Дырэктывы прэзыдэнта Рэспублікі Беларусь “Аб мерах па ўзмацненьню грамадзкай бяспекі і дысцыпліны” ды іншыя. 

Гэткае нечаканае рашэньне аблвыканкама камэнтуе прадстаўнік Беларускага Гельсынкага камітэту, кансультант выдавецкага дома Павал Левінаў:

– Лічу рашэньне Віцебскага абласнога камітэту пра адмену рэгістрацыі бязглуздым. Паказаная недальнабачнасьць і нізкая кваліфікацыя працаўнікоў аблвыканкама: спачатку прымаюць рашэньні – потым іх адмяняюць.

Левінаў называе падобную мітусьню выканаўчага органа незразумелай, а адмову ў рэгістрацыі незаконнай:

– Мы будзем абскарджваць гэтае рашэньне.

У выніку адмены дзяржаўнай рэгістрацыі ўзьнікла пагроза закрыцьця газэты “Віцебскі кур’ер”.

Паводле радыё Рацыя