Рэжым чэмпіянату – рэжым несвабоды

Адна са сталічных газет апублікавала артыкул пад гучнай назвай: “ У рэжыме чэмпіянату:шмат весялімся, шмат гуляем”.  Не ўбачыла рэдакцыя  газеты “маленькую  дробязь“: на весь тэрмін  чэмпіянату  ў сапраўдным турэмным рэжыме апынуліся больш за  30 моладзевых актывістаў грамадзянскай супольнасці – іх затрымалі, так бы мовіць прафілактычна, каб не было ніякіх спакусаў арганізаваць пікеты, флэш-мобы ці ііншыя  непажаданыя ўладам  выказвання думак.

Можна з упэўненасцю сказаць што і  родныя  асуджаных ад 5 да 25 сутак арышту хлопцаў –іхныя  маці і жонкі – пад сценамі ЦІП на вул.Акрэсціна  бавяць час сёння   зусім не з пачуццямі вяселля і жаданнямі пагуляць па горадзе.

Шэраг міжнародных  і беларускіх праваабарончых арганізацый  рашуча асудзіў бязлітасныя меры супраць палітычнай апазіцыі ў Беларусі і факты” прэвентыўнага” зняволення  моладзевых актывістаў.

“Такімі рэпрэсіўнымі мерамі беларускія ўлады спрабуюць правесці аблаву на ўсіх тых, хто падчас чэмпіянату свету па хакеі гатовы выказацца супраць жудаснага становішча з правамі чалавека ў Беларус,”- зазаначаецца ў заяве праваабаронцаў.

Міжнародная Федэрацыя за правы чалавека (FIDH) заклікае больш актыўна распаўсюджваць інфармацыю пра сітуацыю ў краіне.

FIDH стварыла невялікія відэаролікі, каб прыцягнуць увагу да парушэнняў правоў чалавека, якія па-ранейшаму паўсюдныя ў Беларусі і яшчэ больш відавочныя падчас чэмпіянату, які зараз праводзіцца.

«Хакей - усё ОК? У Беларусі правы чалавека парушаюцца кожны дзень. Распаўсюдзь гэтае відэа. Не маўчы!» - праваабаронцы заклікаюць карыстальнікаў сацыяльных сетак падтрымаць гэтую акцыю ў Twitter і Facebook.