Сябры сустрэлі Акрэсцінскага "Бэтмэна"

Валанцёра кампаніі «Ежа замест бомб» Алеся Курца затрымалі падчас чэмпіянату свету па хакеі нібыта за нецэнзурную лаянку.
Пасля 15 сутак арышту выйшаў на волю актывіст Алесь «Бэтмен» Курэц.

Каля дваццаці чалавек прыйшлі сустракаць яго на Акрэсціна. Яны меліся зладзіць там невялікі флэшмоб. Але хлопца вывезлі раней, таму сябры і паплечнікі рушылі да яго дадому.

Алесь Курэц паскардзіўся на рэдкія прагулкі і кепскую ежу. Ён займаецца паўэрліфтынгам і звычайна сілкуецца восем разоў за дзень.

Курэц сядзеў з грамадзянінам Конга Патрык Мангалуа, які знаходзіцца на Акрэсціна каля паўгода.

А апошнія пяць дзён Курэц правеў у камеры для пяцёх чалавек, двое з якіх хварэлі на гепатыт С.