Салідарныя салігорцы

Салігорскія праваабаронцы з Беларускага Хельсінскага Камітэту пры падтрымцы інфармацыйнага інтэрнэт-рэсурса салігорск.org зладзілі апытанне ў сацыяльных сетках. Амаль тры чвэрці рэспандэнтаў заявілі, што палітычных зняволенных неабходна тэрмінова вызваліць.

Салігорскія сябры БХК паспрабавалі даведацца, ці вядома жыхарам горада шахцёраў пра існаванне ў краіне палітычных вязняў.

Высветлілася, што пераважная большасць апытаных ведае пра факт знаходжання ў беларускіх вязніцах асобаў, асуджаных за іх палітычныя перакананні. Толькі 16% апытаных альбо не ведаюць гэткіх фактаў, альбо перакананыя ў адсутнасці такіх вязняў у нашай краіне.

Амаль тры чвэрці апытаных заявілі, што палітычных зняволенных неабходна тэрмінова вызваліць.

З іншага боку, кожны дзясяты лічыць правільным зняволенне беларусаў за іх палітычныя перакананні.

Праваабаронцы адзначыюць, што апытанне праводзілася ў сацыяльных сетках і яго вынікі нельга лічыць рэпрэзэнтатыўнымі, але ўважаюць атрыманыя вынікі досыць паказальнымі. Як мінімум чвэрць даволі актыўнай часткі салігорскай грамадскасці альбо не ведае пра існаванне ў Беларусі палітычных вязняў, альбо лічаць гэта за нармальную з’яву. Выпраўляць стан рэчаў салігорскія абаронцы правоў чалавека плануюць праз правядзенне адмысловых інфармацыйных кампаній па гэтай праблеме.

Паводле ПЦ "Вясна"