Віцэ-спікер бундэстага абяцае падтрымку ўсім палітвязням Беларусі

Віцэ-спікер бундэстага ФРГ Катрын Герынг-Экардт, якая прадстаўляе Партыю зялёных, напісала пра гэта ў сваім віншаванні Алеся Бяляцкага з днём народзінаў, які ён адзначыў учора.

"У сувязі з Вашым вызваленнем з турмы ў чэрвені, заступніцтва, пад якое я ўзяла Вас як зняволенага ў супрацоўніцтве з Libereco і нямецкім парламентам, завяршылася ўдала. Тым не менш, я збіраюся забяспечыць сваю пастаянную падтрымку Вашай працы, а таксама падтрымку ўсім палітычным вязням у Беларусі, якія ўсё яшчэ чакаюць свайго вызвалення", - піша спн. Герынг-Экардт, жадаючы праваабаронцу не губляць сілы духу і не пакідаць барацьбу за лепшую будучыню для ўсіх беларускіх грамадзянаў.

ПЦ "Вясна" нагадвае, што нямецка-швейцарская праваабарончая арганізацыя Libereco - Partnership for Human Rights з 2011 года праводзіць кампанію, заснаваную на ідэі шэфства над палітвязнямі Беларусі з боку еўрапейскіх палітыкаў, гатовых прыняць удзел у іх лёсе, прыкладаючы намаганні па іх вызваленні ў рамках сваёй паўсядзённай працы.