Праваабаронцы заклікаюць прадстаўнікоў міжурадавай арганізацыі наведаць Мікалая Статкевіча

Цэнтр прававой трансфармацыі і Праваабарончы цэнтр "Вясна" перадалі амбасадару, кіраўніку прадстаўніцтва Еўрапейскага Саюза ў Беларусі спадарыні Майры Мора тэрміновы зварот у сувязі з узмацненнем ціска на Мікалая Статкевіча. 

Раней, 8 красавіка 2015 г ЦПТ і ПЦ "Вясна" адправілі на адрас Дэпартамента выканання пакаранняў МУС Рэспублікі Беларусь і адміністрацыі папраўчай калоніі №17 зварот па факце узмацнення ціску на Мікалая Статкевіча з патрабаваннямі спыніць адміністрацыйны ціск, адмяніць незаконныя спагнання, дапусціць прадстаўніка Еўрапейскага саюза і прадстаўніка ААН У Рэспубліцы Беларусь для мэт праверкі ўмоў утрымання і праверкі фактаў ціску.

Праз тыдзень стала вядома, што Мікалая Статкевіча чакае суд, па выніках якога, яго, як мяркуецца перавядуць з папраўчай калоніі ў турму. У сувязі з гэтымі абставінамі, праваабаронцы перакананыя ў неабходнасці экстраных дзеянняў з боку Прадстаўніцтва Еўрапейскага саюза і Прадстаўніцтва ААН і настойліва просяць:

• У тэрміновым парадку наведаць Мікалая Статкевіча для ўласнай ацэнкі ўмоў утрымання і праверкі інфармацыі пра факты ціску ў дачыненні да яго;
• Забяспечыць прысутнасць прадстаўніка Еўрапейскага Саюза і прадстаўніка ААН у Рэспубліцы Беларусь у судовым пасяджэнні ў дачыненні да Мікалая Статкевіча для мэт самастойнага маніторынгу судовага працэсу.

ЦПТ нагадвае: Мікалай Статкевіч, кандыдат у прэзідэнты, асуджаны на 6 гадоў зняволення ў калоніі ўзмоцненага рэжыму па абвінавачванні ў арганізацыі «масавых беспарадкаў» у дзень прэзідэнцкіх выбараў 19 снежня 2010 года. Сваёй віны Мікалай Статкевіч не прызнаў. Міжнародная праваабарончая арганізацыя Amnesty International прызнала Мікалая Статкевіча вязнем сумлення.