Гарадзенцы занепакоены дыскрымінацыяй беларускай мовы

Прадстаўнікі Камітэта “Салідарнасці” правялі сустрэчу з гродзенскімі актывістамі ў межах інфармацыйнай кампаніі “Разам супраць дыскрымінацыі”.

12 снежня ў офісе для грамадскіх сустрэч на Будзённага, 48 сабралася каля пяцідзесяці чалавек. Перад прысутнымі выступалі Іна Кулей, Тамара Сідарэнка, Людміла Ісакава. Прамоўцы распавялі пра выпадкі дыскрымінацыі на прадпрыемствах краіны за сяброўства ў незалежным прафсаюзе, пераслед выкладчыкаў ВНУ за палітычныя погляды. Былі прыведзеныя сведчанні, якія можна расцаніць як выкарыстанне дзяржавай архаічнай сістэмы лячэбна-працоўных прафілакторыяў у якасці рэпрэсіўнага інструмента супраць грамадзянскіх актывістаў.

На мерапрыемстве былі прэзентаваныя і распаўсюджваліся дзевяць відаў буклетаў, прысвечаных розным відам дыскрымінацыі ў Беларусі, а таксама паказваліся відэасведчанні ахвяраў дыскрымінацыі.

Пасля прагляду стужак, адбылася ажыўленая дыскусія на тэму дыскрымінацыі беларускай мовы ў сярэдніх школах, якую ўзняў Алесь Астроўскі. Выступоўцы адзначалі, што ў Гродна надзвычай цяжка забяспечваць права бацькоў на навучанне іх дзяцей на роднай мове, бо ёсць вялікія адміністрацыйныя складанасці і нежаданне адказных асобаў вырашаць гэтую праблему.

Падчас гарадзенскай сустрэчы Андрэй Фёдараў прэзентаваў праект Беларускага дома “Беларусы выбіраюць Еўропу”.

Болей фота тут