Актывіста хочуць пакараць за вершы, якіх ён не чытаў

Актывіст грамадзянскай кампаніі “Еўрапейская Беларусь” Леанід Кулакоў атрымаў SМS з запрашэннем у суд Цэнтральнага раёна Мінска. 13 верасня аб 11 гадзіне адбудзецца разгляд адміністрацыйнай справы, распачатай паводле артыкула 23.34 КоАП, за удзел у акцыі 25 жніўня.

Для Леаніда Кулакова SМS з суда было поўнай нечаканасцю. З яго слоў ніякага пратаколу ў адносінах да яго падчас акцыі не складалася. У копіі, якая была дасланая заказным лістом для азнаямлення, напісана, што актывіст прымаў удзел у несанкцыяваным святкаванні 25-годдзя суверэнітэта Беларусі, які быў абвешчаны ў 1991 годзе Вярхоўным Саветам БССР, чытаў верш у скверы Янкі Купалы і крычаў “Жыве Беларусь” і такім чынам парушыў артыкул 23.34 КоАП. У пратаколе таксама адзначана, што актывіст падпісваць пратакол адмовіўся.

Цікава, што Леанід не удзельнічаў ва ўрачыстым конкурсе на чытанне вершаў Янкі Купалы каля помніка паэта, бо пасаромеўся таго, што не вельмі добра валодае беларускай мовай. Але скандавання “Жыве Беларусь!” актывіст не адмаўляе і ганарыцца гэтым.

Нагадаем, 25 жніўня з ініцыятывы Маладога фронту адбыліся мерапрыемствы у гонар 25-й гадавіны надання Дэкларацыі аб незалежнасці статусу канстытуцыйнага закона праходзіў конкурс на чытанне вершаў Янкі Купалы, а таксама шэсце па праспекту з б-ч-б сцягамі да плошчы Незалежнасці. Па выніку міліцыянтамі было складзена 15 пратаколаў (раней паведамлялася пра 14) паводле артыкула 23.34 КоАП (“несанкцыяваныя мерапрыемствы”). Міліцыянты складалі пратаколы на тых, хто чытаў вершы каля помніка Янкі Купалы, а таксама на актывістаў, якіх добра ведаюць у твар.