Адказаць на каментар

Адзін з заяўнікаў правядзення вулічнай акцыі на Дзень Волі, актывіст Руху “За Свабоду” Мікіта Семяненка не плануе аплачваць паслугі па ахове грамадскага парадку паводле дамовы з ГУУС Мінгарвыканкаму, пакуль не атрымае адпаведнай калькуляцыі выдаткаў.

Гаворка вядзецца пра 5 мільёнаў 367 тысяч рублёў - чацвёртую частку ад агульнай сумы (заяўнікоў было чацвёра). Рэч у тым, што Семяненка просіць мінскую міліцыю “прадаставіць дакументы, якія абгрунтоўваюць парадак разлікаў” выдаткаў міліцыі.

“Бо незразумела, ці сапраўды такая сума спатрэбілася для аховы правапарадку падчас акцыі і колькі супрацоўнікаў міліцыі забяспечвалі яго. Хацелася б пабачыць падрабязны празрысты каштарыс. Апрача таго, адвольныя затрыманні некалькіх удзельнікаў шэсця ставяць пад сумнеў якасць аказанай паслугі. Чаму арганізатары павінны фінансаваць незаконныя затрыманні мірных грамадзян?” - каментуе на pyx.by недавер і цікавасць да міліцэйскай калькуляцыі першы намеснік Руху “За Свабоду” Юрась Губарэвіч.

У сваю чаргу заўважым, што міліцыя мае бюджэтнае фінансаванне, і ахова грамадскага парадку і бяспекі грамадзян з’яўляецца яе прамым службовым абавязкам, які ўжо аплачаны падаткамі грамадзян. Патрабаванне да арганізатараў апазіцыйнай акцыі аплачваць паслугі праваахоўнікаў выглядае дыскрымінацыйным паборам паводле палітычных перакананняў.