Асамблея НДА і Lowtrend падрыхтавалі для ААН альтэрнатыўную справаздачу

Цэнтр прававой трансфармацыі і Асамблея няўрадавых дэмакратычных арганізацыяў падрыхтавалі альтэрнатыўную справаздачу «Свабода асацыяцыяў і прававыя ўмовы для дзейнасці арганізацыяў грамадзянскай супольнасці».

У гэтым дакуменце прадстаўлены экспертны аналіз выканання рэкамендацыяў, якія былі атрыманыя Рэспублікай Беларусь у часе праходжання першага цыклю Універсальнага перыядычнага агляду (UPR) на сесіі Савету па правах чалавека ААН у 2010 годзе, паведамляе прэс-служба Асамблеі НДА.

Аўтары альтэрнатыўнай справаздачы адзначаюць асноўныя прававыя перашкоды, з якімі сутыкаюцца беларускія няўрадавыя арганізацыі у сваёй дзейнасці, а таксама даюць рэкамендацыі па магчымым паляпшэнні забеспячэння свабоды асацыяцыяў у Беларусі.

Стварэнне альтэрнатыўнай справаздачы абумоўлена тым, што ў траўні 2015 году на 22 сесіі Савету па правах чалавека ААН урад нашай краіны прадставіць Савету па правах чалавека сваю справаздачу аб выкананні рэкамендацыяў, якія былі атрыманыя Рэспублікай Беларусь у 2010 годзе ў часе першага цыклю UPR.

Цэнтр прававой трансфармацыі і Асамблея няўрадавых дэмакратычных арганізацыяў ў межах устаноўленай працэдуры ўжо перадалі альтэрнатыўную справаздачу ў Савет па правах чалавека ААН.

Больш падрабязна са зместам альтэрнатыўнага дакумента і планамі яго распаўсюджання беларуская грамадскасць можа азнаёміцца на брыфінгу 11 верасня па адрасе: Мінск, вул. Нававіленская, 38–10, Пачатак у 12.30.