Гомельскую рэлігійную супольнасць абвінавацілі ў несанкцыянаваным мерапрыемстве

Адміністрацыйная справа ў дачыненні гомельскай рэлігійнай супольнасці “Царква Божая “Праабражэнне” накіравана ў суд. Міліцыя склала пратакол па артыкуле 23.34 КаАП Беларусі - парушэнне парадку правядзення масавых мерапрыемстваў.

Пастыру і вернікам супольнасці пагражае штраф у памеры да трыццаці базавых велічынь або адміністрацыйны арышт, паведамляе сайт ПЦ "Вясна".

Нагадаем, 31 траўня міліцыянты і амапаўцы перарвалі набажэнства супольнасці, якое праходзіла ў актавай зале арандаванага адміністрацыйнага будынка ў Цэнтральным раёне Гомеля. Міліцыянты вялі аператыўныя відэаздымкі і сказалі, што нібыта паступіла тэлефанаванне з таксафона пра тое, што праходзіць нейкае несанкцыянаванае мерапрыемства. Пазней вернікаў выклікалі ў пастарунак для апытанняў і складання адміністрацыйных пратаколаў.

Супольнасць зарэгістравана і існуе з 2005 года, у 2012 годзе прайшла перарэгістрацыю.
Пераслед вернікаў, якія не адносяць сябе да праваслаўнай канфесіі, за рэалізацыю права на свабоду сумлення можна разглядаць як праяву дыскрымінацыі.