Далучайся да кампаніі ў падтрымку Яўгена Васьковіча!

Сёння, 16 лютага неабыякавыя грамадзяне запрашаюцца а 18:30 у офіс прафсаюзу радыёэлектроннай прамысловасці ў Мінску на вуліцы Кульман, 4, каб падпісаць віншавальныя паштоўкі палітвязню Яўгену Васьковічу.

Малады чалавек асуджаны на 7 гадоў зняволення за хуліганскія дзеянні ў дачыненні да будынку Камітэту дзяржбяспекі ў Бабруйску. За 3 гады зняволення, паводле сяброў Яўгена Васьковіча, ён адбыў больш за 200 дзён у карцэры.

Дагэтуль вязень магілёўскай турмы больш за год не сустракаўся з маці і толькі напачатку лютага адміністрацыя ўстанова дала яму такую магчымасць. Як распавяла "Радыё Свабода" ягоная маці Рушання, яны нарэшце пабачыліся, дакладней, цягам 2 гадзінаў размаўлялі праз шкло.

Ужо больш за 5 гадоў кожны 16 дзень месяца дае нагоду ўсяму свету звярнуць увагу на палітычныя рэпрэсіі ў Беларусі. Грамадскія і палітычныя актывісты заклікаюць усіх людзей добрай волі далучацца да падпісання віншавальных паштовак палітзняволеным.

Гэтым разам прапануецца падтрымаць Яўгена Васьковіча, якому 26 лютага споўніцца 24 гады. Гэта пяты дзень народзінаў у няволі.

Напісаць ліст падтрымкі Яўгену Васьковічу можна не толькі падчас акцыі салідарнасці ў РЭП. Гэта можна зрабіць у любы час дома ці ў вольную хвіліну на працы. Даслаць ліст альбо паштоўку можна на адрас:  212013, Магілёў, Слаўгарадская шаша, 183, ВК-15