Магілёўскія пажарнікі пакаралі актывіста за Дзень вайсковай славы

Камісія Магілёўскага раённага аддзелу надзвычайных сытуацыяў дала папярэджаньне кіраўніку гарадзкой арганізацыі Таварыства беларускай мовы Алегу Дзячкову за парушэньне правілаў пажарнай бясьпекі ў лесе.

Пажарнікі зьвінавацілі спадара Дзячкова ў тым, што ён расклаў вогнішча.

Алега Дзячкова, разам з дваццацьцю актывістамі, затрымалі 8 верасьня ў Любускім лесапарку Магілёва міліцыянты з роты хуткага рэагаваньня.

У лесапарку актывісты адзначалі Дзень беларускай вайсковай славы. У Кастрычніцкі аддзел міліцыі, куды даставілі актывістаў, тэрмінова выклікалі інспэктара з раённага аддзелу Міністэрства надзвычайных сытуацыяў, які склаў пратакол аб адміністрацыйным правапарушэньні.

У Магілёве Алег Дзячкоў ня першы, каго караюць пажарнікі.

4 верасьня на 155 тысяч рублёў аштрафавалі Зьмітра Салаўёва. Камісія зьвінаваціла яго ў парушэньні правілаў пажарнай бясьпекі ў лесе.

Паведамляе радыё Свабода