Моладзевыя актывісты апазыцыі арыштаваныя на 15 і 10 сутак

Суд Цэнтральнага раёну Менску пакараў арыштам двух моладзевых актывістаў: Алеся Каліту – на 15 сутак, Паўла Серадзенку – на 10. Актывістаў затрымалі спэцназаўцы 3 ліпеня й абвінавацілі ў дробным хуліганстве.

Адміністрацыйныя справы Алеся Каліты й Паўла Серадзенкі разглядала судзьдзя Тацяна Паўлючук. У кабінэт судзьдзі трапілі ня ўсе ахвотныя, якія ад 9 раніцы чакалі хлопцаў каля будынку суду (гэта былы будынак Коласаўскага ліцэю).

Першым судзілі актывіста руха “За свабоду” Паўла Серадзенку. Ён заявіў, што 3 ліпеня быў у сядзібе Партыі БНФ, калі пачуў з вуліцы крыкі Насты Александровіч аб дапамозе. Павал апавёў, што паглядзеў у акно й ўбачыў, як невядомыя мужчыны цягнуць Насту ў машыну. Павал і Алесь Каліта пабеглі ратаваць дзяўчыну. У выніку хлопцаў саміх затрымалі. Іх адвезьлі ў міліцыю Цэнтральнага раёну. Там на Паўла й Алеся склалі пратаколы, абвінаваціўшы іх у дробным хуліганстве. Ноч хлопцы правялі ў турме на вуліцы Акрэсьціна. У суд іх прывезьлі учора толькі ў 15 гадзінаў.

Сьведка з боку міліцыі спэцназавец Гвардзейцаў у судзе паведаміў, што з камітэту, якому яны падпарадкоўваліся, далі каманду затрымліваць маладых людзей, якія выходзяць з управы Партыі БНФ у іхны бок. Гвардзейцаў казаў, што спэцназаўцаў папярэдзілі аб тым, што маладыя людзі могуць мець пры сабе дыскі й агітацыйную літаратуру.

Судзьдзя Тацяна Паўлючук пакарала Паўла арыштам на 10 сутак. Яна патлумачыла, што да сьведчаньняў Насты Александровіч трэба ставіцца крытычна.

Наступным судзілі Алеся Каліту. Ён заявіў хадайніцтва, патрабуючы перакладчыка. На думку назіральнікаў, гэта раззлавала судзьдзю. Перакладчыка выклікалі, але Алеся пакаралі арыштам на максымальны тэрмін – 15 сутак арышту.

Алесь Каліта заявіў у судзе, што лічыць затрыманьне прэвэнтыўнай мерай і як доказ прывёў паказаньні спэцназаўца.

Хлопцаў адводзілі ў міліцэйскі “варанок” пад воплескі прысутных. Сябры незарэгістраванай арганізацыі “Малады фронт” выказалі сваю салідарнасьць з моладзевымі актывістамі. Яны паведамілі радыё “Свабодзе”, што будуць ладзіць пікеты каля будынку турмы на вуліцы Акрэсьціна.

Па матэрыялам svaboda.org i milinkevich.org