Міколу Статкевіча верагодна перавядуць у Магілёўскую турму

Такое меркаванне выказала жонка палітвязня Марына Адамовіч.

Нагадаем, учора суддзя Святлана Баранцава задаволіла хадайніцтва Шклоўскай калёніі № 17 і асудзіла Міколу на турэмны рэжым адбывання рэшты тэрміну пакарання. На сёння — гэта 1 год, 7 месяцаў і 14 дзён.

“Мікола дужа спакойна ўспрыняў вырак. Для яго гэта было дужа ўсё зразумела. Сюрпрызаў не было. Ён скарыстаў гэты працэс, каб яшчэ раз агучыць свае перакананьні, і прасіў перадаць усім, што ніколі, ні пры якіх умовах ад іх не адмовіцца”, - цытуе словы Марыны Адамовіч Радыё Свабода.

Суд праходзіў на тэрыторыі калоніі. На яго пасля шматлікіх узгадненняў удалося трапіць толькі жонцы і адвакату. Праваабаронцаў і журналістаў не пусцілі.

Палітыкі выказваюць меркаванне, што ўскладненне сітуацыі з палітвязнямі звязанае з перакананнем афіцыйнага Мінска ў магчымасці нармалізацыі адносінаў з Захадам без вырашэння гэтага балючага пытання ў бліжэйшай перспектыве.