Незалежныя журналісты сустрэліся са сваякамі Дзмітрыя Завадскага

7 ліпеня ў сталічным офісе ГА “Беларуская асацыяцыя журналістаў” адбылася сустрэча журналістаў з роднымі зніклага ў 2000 годзе аператара тэлеканала “ОРТ” Дзмітрыя Завадскага, паведамляе сайт арганізацыі. 

– Справы Дзмітрыя Завадскага, Веранікі Чаркасавай, Алега Бябеніна ніколі не будуць забытыя журналісцкай супольнасцю. З года ў год ГА “Беларуская асацыяцыя журналістаў” уздымае непрыемныя для ўладаў пытанні наконт лёсу нашых загінулых калег. Смерць журналістаў у гарачых кропках часам можна зразумець – там ідзе вайна, там ідзе страляніна... Але калі журналісты гінуць у мірнай краіне – гэта дзіўна і жахліва, – зазначыла старшыня ГА “БАЖ” Жанна Літвіна.

Справа аб выкраданні нашага калегі Дзмітрыя Завадскага выглядае вельмі падазронай, бо разглядалася яна за зачыненымі дзвярамі. Грамадства цікавяць акалічнасці справы, цікавяць імёны сапраўдных злачынцаў.

Дзмітрый Завадскі не баяўся брацца за цяжкія тэмы, ехаць у небяспечныя месцы. Але расправіліся з ім у “мірнай” краіне і ў мірны час, па дарозе ў аэрапорт. І ўлады гэтай краіны так і не далі цямнага адказу на пытанне, што адбылося.

– Апошнія чатырнаццаць год былі самымі цяжкімі гадамі майго жыцця, – кажа Святлана Завадская. – Страшна падумаць, што мінула ўжо столькі часу, а мы дагэтуль не ведаем, што адбылося. Улады, на жаль, не зрабілі нічога, каб пакараць сапраўдных вінаватых. Каб праяснілася сітуацыя, на маю думку, у першую чаргу павінны быць дапытаныя Віктар Шэйман, Уладзімір Навумаў і Юрый Сівакоў. Наколькі мне вядома, ключавых людзей у гэтай справе ўлады так і не апыталі. У нас назбіраліся цэлыя тэчкі перапіскі са следчымі органамі, пра справу Завадскага ўвесь час нагадвалі міжнародныя структуры, але следчыя органы не зрабілі ніводнага кроку насустрач.

Удзел у сустрэчы з роднымі Дзмітрыя Завадскага ўзялі Таццяна Мельнічук, Генадзь Кеснер, Аліна Суравец і іншыя журналісты.