Папа Францішак заклікаў да салідарнасці з Украінай

20 красавіка Святы Айцец Францішак скіраваў заклік да салідарнасці з Украінай. Беларускія каталікі далучыліся да акцыі па зборы ахвяраванняў для пацярпелых падчас канфлікту на усходзе Украіны.

«Насельніцтва Украіны доўга пакутуе ад наступстваў узброенага канфлікту, забытага многімі. Як ведаеце, я заклікаў Касцёл у Еўропе падтрымаць ініцыятыву, мной устаноўленую, каб выйсці насустрач гэтай надзвычайнай гуманітарнай сітуацыі.

Загадзя дзякую ўсім, хто шчодра далучыцца да ініцыятывы, якая пройдзе 24 красавіка», — перадае словы Папы на заканчэнні агульнай аўдыенцыі ў Ватыкане сайт catholic.by.

Пра збор ахвяраванняў для ахвяр канфлікту ва Украіне Пантыфік абвясціў 3 красавіка ў прамове перад малітвай «Regina Caeli». «Гэты акт міласэрнасці мае на мэце не толькі палегчыць матэрыяльныя пакуты, але і жадае таксама выказаць маю блізкасць і асабістую салідарнасць з ўсім Касцёлам. Я шчыра спадзяюся, што гэты жэст дапаможа паспрыяць міру і павазе правоў на гэтых так выпрабаваных землях», — сказаў тады Святы Айцец.

Як паведамляе “Наша Ніва” са спасылкай на БелТА, каталікі Беларусі далучацца да акцыі па зборы ахвяраванняў для пацярпелых падчас канфлікту ва Украіне.