Салідарнасць футбольных фанатаў на матчы Украіна–Беларусь у Львове (ФОТА, ВІДЭА)

Адборачны матч Чэмпіянату Еўропы Украіна–Беларусь, што прайшоў у Львове 5 верасня, запомніцца не столькі крыўднай паразай беларусаў, колькі трыбунамі. Фанаты абедзвюх каманд змаглі стварыць на стадыёне непаўторную атмасферу братэрства і свята.

Раніцой 5 верасня, у дзень матчу нацыянальных зборных па футболе ў Львове, беларускія і ўкраінскія футбольныя фанаты здалі кроў для людзей, пацярпелых ў зоне баявых дзеянняў ва Украіне.

Перад матчам фанаты зладзілі супольнае шэсце салідарнасці ў горадзе. Яно распачалася з вуліцы Герояў Майдану. Агулам, як перадаюць карэспандэнты «Нашай Нівы», на яго прыйшло каля 1000 чалавек, большасць з якіх складаюць беларусы. Заўзятары спяваюць песні, крычаць лозунгі.

У гасцявым сектары «Арэны-Львоў» фанаты разгарнулі банер «Трымайцеся, браты» з украінскім сцягам і гербам. Над трыбунамі таксама лунала безліч украінскіх і беларускіх нацыянальных сцягоў Атмасфера на матчы вельмі цёплая: заўзятары пераклікаюцца патрыятычнымі крычалкамі і спяваюць вядомую песню пра расійскага прэзідэнта Уладзіміра Пуціна.

Паводле радыё "Свабода" і "Наша Ніва"