У Польшчы рыхтуецца тэатральная пастаноўка паводле баек Адама Міцкевіча (ФОТА)

Спектакль 28-га сакавіка на публічнай тэатральнай пляцоўцы Impart горада Уроцлаў прэзентуюць беларускія і польскія дзеці ў межах праекта “Dzieci razem” пры падтрымцы Камітэта “Салідарнасць” і польскага фонду “My razem”.

Адмыслова для тэатральнай пастаноўкі беларускім бокам былі перакладзены на беларускую мову шэсць баек Адама Міцкевіча: “Сябры”, “Тхор на выбарах”, Жабкі і каралі”, “Сабака і воўк”, “Ліса і казёл”, “Заяц і рапуха”. У спартовай залі ўроцлаўскай гімназіі №2, якая таксама з’яўляецца партнёрам праекта “Dzieci razem”, актыўна праходзяць рэпетыцыі з удзелам беларускіх дзяцей і іх польскіх аднагодкаў пад кіраўніцтвам рэжысёра-пастаноўшчыка, старшыні фонда уроцлаўскага тэатра Сapitol Томаша Штонэка.

У спектаклі акрамя яркіх арыгінальных дыялогаў з твораў Адама Міцкевіча прадугледжана шмат пластыкі і пантамімы. Спецыяльна для пастаноўкі напісана музычнае суправаджэнне Кшыштофам Жэслаўскім.