Эксперты праваабарончай супольнасці Беларусі назвалі імёны новых вязняў сумлення

Беларускія праваабаронцы прызналі Ігара Аліневіча, Мікалая Дзядка, Аляксандра Францкевіча палітычнымі зняволенымі дзеючага ў Беларусі рэжыму. Да такой высновы праваабаронцы прыйшлі на падставе адмыслова праведзенага аналізу так званай “Справы анархістаў”.
 
Паводле заключэння Беларускага Хельсінскага Камітэта, дадзенае рашэнне грунтуецца на падставе наступных высноваў:
 
1. Папярэдняе следства па крымінальнай справе
суправаджалася сур'ёзнымі працэсуальнымі парушэннямі, у тым ліку правоў асуджаных. Сярод іх: адвольныя затрыманні, парушэнне тэрмінаў і працэдур затрымання, устаноўленых Крымінальна-працэсуальным кодэксам Беларусі, парушэнне права на абарону, парушэнне прынцыпу прэзумпцыі невінаватасці і інш. Затрыманне І. Аліневіча ў г. Маскве і яго дастаўленне ў СІЗА КДБ у г.Мінск ажыццяўляліся з грубымі парушэннямі устаноўленых працэдур, у тым ліку працэдуры экстрадыцыі грамадзян з тэрыторыі Расійскай Федэрацыі ў Беларусь.


Асуджаныя І. Аліневіч, М. Дзядок, А. Францкевіч падчас судовага працэсу заяўлялі аб тым, што ў дачыненні да іх падчас папярэдняга следства выкарыстоўваліся незаконныя дзеянні: псіхалагічны ціск і катаванні. Аб прымяненні да іх катаванняў заявілі ў судовым разглядзе і шэраг сьведкаў, якія адмовіліся ад сваіх паказанняў, дадзеных імі на папярэднім сьледзтве (К. Коўка, А. Жынгероўскі, І. Багачак, А. Бугаёў, С. Слюсар). Дадзеныя абставіны ў ходзе папярэдняга следства і судовага разгляду з належнай паўнатой не правяраліся і ім не была дадзена прававая ацэнка.
 
2. У ходзе судовага працэсу парушаўся прынцып роўнасці бакоў па прадстаўленні доказаў. Грубыя парушэнні правоў асуджаных даюць падставу сцвярджаць, што разгляд справы ў судзе не быў аб'ектыўным, поўным і ўсебаковым, а вынесены прысуд – неабгрунтаваны і незаконны. Вынесены пры такіх абставінах прысуд павінен быць адменены, а справа – накіравана на новы разгляд.
 
3. Змяшчэнне пад варту І. Аліневіча, М. Дзядка, А. Францкевіча, іх асуджэнне да такіх доўгіх, відавочна неадэкватных тэрмінаў пазбаўлення волі, пры несправядлівым разглядзе "відавочным чынам звязана з палітычнымі матывамі ўладаў".


4. РПГА "Беларускі Хельсінкскі Камітэт", эксперты праваабарончай супольнасці Беларусі па выяўленых аб'ектыўных крытэрах лічаць Ігара Аліневіча, Мікалая Дзядка, Аляксандра Францкевіча, якія знаходзяцца ў месцах пазбаўлення волі, палітычнымі зняволенымі дзеючага ў Беларусі рэжыму.