“Дэпутаты” і “краты”

Іван Амельчанка, аўтар плаката “Мусарок” напярэдадні сёлетней парламенцкай выбарчай кампаніі абвесціў пра “свой намер балатавацца ў дэпутаты”. Гэтай падзее хлопец прысвяціў адмысловую жартаўлівую прэсавую канфэрэнцыю разам са сваімі паплечнікамі.  Амельчанка зазначыў, што іхняя “кампанія“- добрая нагода, каб “паказаць  людзям абсурднасць выбарчага працэсу ў сучаснай Беларусі”.

Спецслужбоўцы не ацанілі пачуццё гумару актывіста. Відаць, словаспалучэнне “дэпутаты і краты”нейкім неверагодным чынам   рыфмуюцца ў галавах нашых сілавікоў.  Яны вырашылі, што лепш “прэвентыўна” затрымаць хлопца -  на ўселякі выпадак .


Амельчанка “традыцыйна” быў абвінавачаны ў лаянцы матам і змешчаны ў ізалятар часовага ўтрымання на завулку Акрэсціна.


У той самы час быў затрыманы і шэраг актывістаў “Маладога Фронту”.
 
Рамана Пратасевіча, Уладзіміра Яроменка і Рамана Васільева таксама абвінавацілі ў лаянцы матам. Пры гэтым супрацоўнікі міліцыі Савецкага раёну здолелі пачуць, як лаяўся Пратасевіч, які ляжаў у ложку сваёй кватэры ажно ў Першамайскім раёне.


Праваабаронцу Касю Галіцкую, якая прыехала падтрымаць арыштаваных сяброў у суд, выкралі наўпрост з судовага будынку. Высветлілася, што і дзяўчына “таксама лаялася матам”. За што атрымала 10 сутак арышту.


Кася і раней   трымала несправядлівыя суткавыя арышты на Акрэсціна за падтрымку сяброў з “Маладога Фронта ” і  “ Маладой Беларусі”. Кацярына - дзяўчына з прыгожымі блакітнымі вачыма - была адной з удзельніц улюбёнай акцыі моладзі на дзень Святога Валянціна – анёльчыкам з сардэчкамі і бянгальскімі ліхтарыкамі.


Напрацягу 2006 – 2010 гадоў  маладую  праваабаронцу Касю Галіцкую двойчы звальнялі з працы, як перакладчыцу з замежных моваў.