10 снежня – уручэнне прэміі Аляхновіча

У Сусветны дзень правоў чалавека адбудзецца ўганараванне лаўрэатаў літаратурнай прэміі Францішка Аляхновіча за творы, напісаныя ў няволі.

Сярод намінантаў сёлетняй прэміі: Наста Азарка, Алесь Бяляцкі, Аляксандр Буд-Гусаім, Зміцер Дашкевіч, Анатоль Міхнавец, Фелікс Пекер, Павал Севярынец, Аляксандр Фядута, Ірына Халіп.

Радыё Свабода нагадвае, што прэмія імя беларускага драматурга, публіцыста і празаіка, аўтара аповесці «У капцюрох ГПУ» Францішка Аляхновіча заснаваная ў 2013 годзе Беларускім ПЭН-цэнтрам і Радыё Свабода. Тэматыка твораў, якія могуць прэтэндаваць на прэмію, ніякімі патрабаваннямі не абмежаваная. На разгляд прымаюцца дакументальныя і мастацкія творы на беларускай і рускай мовах, як апублікаваныя, гэтак і ў рукапісах, створаныя ў зняволеньні і дасланыя на працягу году. Права намінацыі маюць таксама ўсе сябры ПЭН-Цэнтру.

Акрамя цырымоніі будзе зладжаны канцэрт Змітра Вайцюшкевіча і прэзентацыя яго праекту турэмнага шансону па-беларуску «Варанок».

Вечарына пачнецца а 18-й гадзіне ў Сядзібе Партыі БНФ (Чарнышэўскага, 3-39). Уваход вольны.