Адказаць на каментар

29 кастрычніка ў неафіцыйны дзень памяці ахвяраў таталітарызму каля 150 чалавек расцягнуліся ўздоўж праспекту Незалежнасці ля сцен КДБ і запалілі знічкі. Памятныя мерапрыемствы адбыліся і ў іншых гарадах краіны.

Акцыя памінання ахвяраў сталінскіх рэпрэсій ладзілася з ініцыятывы Мікалая Статкевіча.

Міліцыя склала пратаколы на Уладзіміра Някляева і Мікалая Статкевіча, а таксама на лідара АГП Анатоля Лябедзькі, піша novychas.by (на сайце таксама можна паглядзець фотарэпартаж) .

Як паведамляе сайт spring96.org, памятныя мерапрыемствы ў гэты дзень прайшлі таксама ў іншых гарадах краіны.

Жыхары горада Пружаны ў Брэсцкай вобласці прынеслі знічкі да будынка былога Пружанскага аддзела НКВД, дзе некалі катавалі ксяндза Казіміра Свёнтака, паведамляе nn.by.

У Баранавічах грамадскія актывісты і праваабаронцы  ўшанавалі памяць ахвяраў палітычных рэпрэсій у Беларусі каля Крыжа ахвяраў сталінскіх рэпрэсій.

Віцебскія актывісты таксама ўшанавалі памяць ахвяр сталінскіх рэпрэсій. 29 кастрычніка група актывістаў вырашыла паставіць на ўзлеску каля вёскі Хайсы новы крыж.

Прадстаўнікі Беларускай сацыял-дэмакратычнай партыі (Грамада) правялі акцыю, прымеркаваную да Дня памяці ахвяраў палітычных рэпрэсій, у Брэсце. Акцыя адбылася на Трышынскіх могілках Брэста каля помніка ахвярам сталінскіх лагераў.

У Магілёве на месцы масавых расстрэлаў грамадзян, якія адбываліся ў 1920-30 гады, мясцовыя актывісты Таварыства беларускай мовы ўсталявалі Крыж памяці. Сродкі на яго зьбіралі талакою.

Нагадаем, у ноч з 29 на 30 кастрычніка 1937 году, у сутарэннях мінскай унутранай турмы НКВД былі расстраляныя больш за 100 прадстаўнікоў нацыянальнай інтэлігенцыі - літаратары, дзяржаўныя дзеячы і навукоўцы.