Адказаць на каментар

Старшыня Беларускай асацыяцыі журналістаў Андрэй Бастунец пракаментаваў чарговы зварот прафесійнай супольнасці да міністра інфармацыі Ліліі Ананіч. 

Прадстаўнікі СМІ настойліва просяць Ананіч пра асабістую сустрэчу з журналісцкай супольнасцю, каб абмеркаваць пытанне. І такі дыялог патрэбны – перакананы Андрэй Бастунец.

– Калі журналісты такую ініцыятыву праяўляюць, трэба яе рэалізоўваць. І я падтрымліваю гэта. Іншая рэч, што я не вельмі чакаю станоучага адказу ад міністэрства. Але трэба ж іх неяк штурхаць, каб яны адчувалі настрой журналісцкай супольнасці.

У новым звароце прадстаўнікі СМІ пералічваюць амаль сорак беларускіх журналістаў, збітых міліцыяй за апошнія дзесяць гадоў. Прадстаўнікі СМІ настойліва просяць міністра інфармацыі пра асабістую сустрэчу з журналісцкай супольнасцю для абмеркавання пытанняў бяспекі супрацоўнікаў выданняў, а таксама прапануюць экспертную дапамогу ў гэтым вострым пытанні.

Журналісты заклікаюць Міністэрства інфармацыі рашуча асудзіць дзеянні супрацоунікаў сілавых органаў, што парушаюць правы журналістаў.

На першы зварот у справе збітага журналіста партала TUT.BY Паўла Дабравольскага чыноўніца абмежавалася адпіскай, маўляў, журналіст перашкаджаў супрацоўнікам міліцыі і быў затрыманы законна. Міністр стала на бок міліцыі, супрацоўнікі якой збілі Паўла Дабравольскага ў будынку мінскага суда.

Паводле Радыё Рацыя