Бабруйскія актывісты патрабуюць спыніць ціск на сябраў незалежнага прафсаюза

Прадстаўнікі грамадскасці Бабруйска звярнуліся са зваротам да старшыні гарвыканкама, у якім заявілі пра поўную падтрымку звольненых на "Бабруйскім заводзе трактарных дэталяў і агрэгатаў" сябраў Свабоднага Прафсаюза Беларускага, якія абвясцілі галадоўку.

Зварот падпісалі мясцовыя кіраўнікі Беларускай Хрысціянскай Дэмакратыі, Аб’яднанай грамадзянскай партыі, Беларускай сацыял-дэмакратычнай партыі (Грамада), Беларускага прафсаюзу працаўнікоў Радыёэлектроннай прамысловасці і іншыя, паведамляе bchd.info

Паводле іх словаў, адміністрацыя завода працяглы час аказвае непрыхаваны ціск на сябраў СПБ. "Незаконныя дзеянні службовых асобаў прадпрыемства прыносяць маральныя пакуты не толькі работнікам і іх сем'ям, але і атрымалі негатыўнае стаўленне да таго, што адбываецца з боку жыхароў Бабруйска”, - гаворыцца ў лісце.

"Сёння выразна выяўляецца тэндэнцыя на знішчэнне непажаданых: Мікалая Жыбуля, Алега Шаўчэнкі, Аляксандра Варанкіна, Аляксандра Грамыкі, нягледзячы на іх высокую кваліфікацыю і бездакорную рэпутацыю ў працоўным калектыве прадпрыемства”, - заяўляюць актывісты.

Яны патрабуюць неадкладна спыніць ціск на сяброў СПБ, уступіць у перамовы з удзельнікамі галадоўкі, выканаць іх законныя патрабаванні аб аднаўленні на працы, выйсці з прапановай да Міністэрства прамысловасці аб неадкладным скасаванні кантракту з дырэктарам БЗТДіА А. Аграновічам, які "дыскрэдытуе пасаду кіраўніка прадпрыемства”.

У выпадку невыканання адміністрацыяй заводу законных патрабаванняў звольненых работнікаў, лідары мясцовай дэмакратычнай супольнасці пакідаюць за сабой права заклікаць грамадзян Бабруйскага рэгіёна на акцыю салідарнай падтрымкі галадоўнікаў.