Заяўнікі пікета сутыкнуліся з дыскрымінацыяй

Праваабаронцы, выказалі меркаванне, што забарона на правядзенне пікета салідарнасці з Украінай для Алеся Марчанкі і Арцёма Лявы абумоўлена дыскрымінацыйнымі нормамі Закона ў адносінах да тых, хто цягам году здзейсніў адміністратыўнае парушэнне паводле артыкула 23.34 Закона “Аб масавых мерапрыемствах”.

Згодна з Законам, тыя, хто ўдзельнічаў у несанкцыяванай акцыі цягам года не маюць права арганізоўваць масавую акцыю альбо пікетаванне нават выконваючы ўсе патрабаванні заканадаўства. Ім проста забаронена гэта рабіць.

Такім чынам, у Законе “Аб масавых мерапрыемствах у Рэспубліцы Беларусь” закладзена відавочнае абмежаванне ў правах на ўдзел і арганізацыю мітынгаў, акцый і пікетаў для тых, хто раней парушыў правілы іх правядзення.

“Так, мы сапраўды вясной правялі акцыю ў падтрымку Украіны. Мы тады вымушана парушылі заканадаўства і не чакалі, пакуль нам дадуць альбо не дадуць дазвол праз два тыдні, бо сітуацыя вымагала ад нас неадкладнага грамадзянскага дзеяння, праявы салідарнасці з украінскім народам, бо Расія захапіла Крым. І вось зараз мы імкнуліся ўсё зрабіць паводле Закона. А гэты Закон, як выявілася, забараняе нам пікетаваць увогуле. Гэта тое ж самае, калі б мне забаранілі карыстацца грамадскім транспартам на той падставе, што я адзін раз быў аштрафаваны за безбілетны праезд”, - кажа Алесь Марчанка.

Заяўнікі пікетаў салідарнасці цяпер шукаюць шляхоў звароту ў Канстытуцыйны суд Рэспублікі Беларусь, каб ён праверыў сумнеўную норму Закона “Аб масавых мерапрыемствах у Рэспубліцы Беларусь” на адпаведнасць Асноўнаму Закону краіны. Як вядома, гэта ў Беларусі зрабіць простаму грамадзяніну зусім не проста. Падаваць жа ў суд на забарону правесці пікетаванне, як выявілася, ня мае сэнсу, бо “усё па законе”.