Неабыякавасць

Падчас Калядных і навагодніх святаў не зачыняюцца дзверы ў сям’і Шацікавых, якую у мінулым годзе напаткала трагедыя – заўчасны сыход з жыцця вядомай магілёўскай актывісткі Крысціны Шацікавай. Сябры дэмакратычнага руху ў меру сваіх магчымасцяў імкнуцца падтрымаць дзяцей, застаўшыхся сіратамі, і іх бабулю.  Зараз усе цяжкасці - і ў выхаванні дзяцей, і матэрыяльныя - ляглі на плечы Святланы Міхайлаўны - маці Крысціны.
 
Сама Крысціна  заўсёды паказвала выключнаю мужнасць у самых розных абставінах. Не змаглі зламіць яе ні міліцэйскія дубінкі, ні шматлікія арышты , ні ціск на родных. Пасля сябе Крысціна пакінула самае дарагое, што было ў яе жыцці, дваіх  сыноў, Нікіту і Ягора, якія да гэтага часу не дасягнулі паўнагадовага ўзросту.
 
Напэўна, няма на свеце для дзяцей  большага гора, чым страта маці.



30 снежня у Нікіты быў дзень нараджэння, першы, які ён сустракаў без мамы. Яму споўнілася 17 год. Павіншаваць хлопчыка прыйшлі сябры абласной арганізацыі Аб’яднанай грамадзянскай партыі Уладзімір Шанцаў і Эдуард Абакановіч. Яны ўручылі Нікіце і яго брату падарункі і перадалі матэрыяльныя сродкі, сабраныя ў Мінску і Магілёве.



Па словах Святланы Міхайлаўны, час ад часу да іх прыходзяць зусім незнаемыя, неабыякавыя людзі каб аказаць падтрымку.