Паранены ва Украіне беларус, якому збіралі грошы на лекаванне, памёр у шпіталі

33-гадовы Алесь Чаркашын з пазыўным "Тарас" ваяваў за незалежнасць Украіны ў Данбасе. У пятніцу ён памёр ад цяжкіх раненняў, атрыманых два з паловай тыдні таму, падчас сутыкненняў з расійскімі баевікамі.

Як паведамляе "Наша Ніва", Чаркашын ваяваў у складзе групы Добраахвотнага ўкраінскага корпусу Правага сектару. Ён атрымаў раненне з 82-міліметровага мінамёта БМ-37. Аскепкі міны трапілі ў грудзі, нырку і галаву. Пасля цяжкага ранення ён два тыдні знаходзіўся ў коме. Было зроблена некалькі аперацый, але выратаваць «Тараса» не ўдалося. Памер хлопча у шпіталі ў Запарожжы.

Алесь Чракашын вядомы сваім актыўным удзелам у барацьбе беларусаў за грамадзянскія правы, быў вернікам, ачольваў брэсцкую арганізацыю БХД.

«У 2011 годзе яны разам з Змітром Шурхаем ладзілі ў Брэсце маўклівыя акцыі, іх затрымлівалі не раз, — узгадвае сустаршыня аргкамітэта БХД Павел Севярынец. — Ён быў прадпрымальнікам, але аддаваў сябе і грамадскім справам. На Плошчы 2010 года абараняў людзей ад збіцця, нават маю матулю. 15 снежня 2013 зладзіў найбольш яркую сваю акцыю. Ён выйшаў да Брэсцкага аблвыканкама ў адзенні прарока з «акрываўленымі» рукамі, у ланцугах. Вось як сёння стаіць перад мной такая карціна. Ён заклікаў людзей пакаяцца за грахі, а ўладу папярэджваў за злыя дзеянні супраць людзей».

Пахаванне адбудзецца ў Брэсце 1-га верасня.

Нагадаем, 26-га жніўня у Мінску прайшла вечарына салідарнасці з параненым у баях за Украіну Алесем Чаркашыным, падчас якой збіраліся грошы на яго лекаванне. У той дзень яго сапраўднае імя не называлася ў мэтах бяспекі хлопца.