Пачынаецца серыя трэнінгаў па матывацыі для тых, хто быў звольнены з працы

Трэнерам заняткаў з агульнай тэмай «Асабістая эфектыўнасць і матывацыя: формула поспеху» выступае псіхолаг, кансультант, спецыяліст у галіне арт-тэрапеўтычных тэхнік Таццяна Крашэўская. 

Праграма, якая рэалізуецца пры падтрымцы камітэта "Салідарнасць", дапаможа яе ўдзельнікам, людзям, звольненым за сваю грамадзянскую пазіцыю, даследаваць свае асобасныя асаблівасці, паспрыяць самараскрыццю, самапазнанню, высвятленню «Я-канцэпцыі», ўсведамленню сваіх сацыяльных роляў.

Удзельнікаў азнаёмяць з тэхнікамі для пазітыўнага мыслення і дасягнення поспеху.

Псіхолаг дапаможа выявіць і змяніць асобасныя ўстаноўкі, якія перашкаджаюць у адэкватным самавызначэнні і плённай дзейнасці, знізіць трывожнасць, знайсці прычыны і адпрацаваць навыкі прафілактыкі стрэсавага напружання, адшукаць крыніцы развіцця матывацыі дасягнення поспеху ды ўзмацніць іх дзеянне.

21-22 кастрычніка праходзіць першая сесія трэнінгаў. Тэма: «Асаблівасці асобы: даведайся, хто ты, каб зразумець, што рабіць».

У гэтыя дні разглядаюцца фактары паспяховасці чалавечай дзейнасці, ўзаемасувязь асабістых асаблівасцяў чалавека з перавагай тыпу матывацыі, віды матывацыі (матывацыя да дасягнення поспеху і матывацыя да пазбягання няўдач).

Трэнер распавядзе, як асобасныя асаблівасці і характарыстыка паводзін чалавека суадносяцца з канкрэтным тыпам матывацыі. Запланаваны практычныя заняткі.