Святлана Алексіевіч ахвяравала на лячэнне Леаніда Маракова

Нобелеўская лаўрэатка, даведаўшыся пра цяжкі стан пісьменніка і даследчыка сталінскіх рэпрэсіяў Леаніда Маракова, перадала на яго падтрымку і догляд тысячу даляраў.

Лекары дыягнаставалі ў пісьменніка пухліну галаўнога мозгу (анкалогія чацвёртай ступені), якая развілася пасля цяжкага інсульту. Яго плануецца перавесці ў так званы “Дом міласэрнасці”, якія аказвае паслугі на платнай аснове.

Леанід Маракоў мае сына і дачку, але яны вучацца ў Польшчы. Зараз дапамагаюць пісьменніку і арганізуюць збор сродкаў неабыякавыя людзі — Наталля Саматыя, Алесь Макаеў, Вадзім Пракопчык ды іншыя.

Дапамагчы Леаніду Маракову можна, пералічыўшы сродкі на рахунак № 5351 0410 8976 2734 у банку МТБ (картка дзейнічае да 02|19).

Леанід Маракоў (нар. у 1958 годзе) — інжыне-радыёэлектронік, у 1990-я стаў вывучаць біяграфію свайго дзядзькі, паэта Валера Маракова, які быў расстраляны 29 кастрычніка 1937 году. Вынікам працы стала маштабнае даследаванне сталінскіх рэпрэсіяў у Беларусі — падрыхтаваны і часткова выдадзены 10-тамовы энцыклапедычны даведнік пад назвай «Рэпрэсаваныя літаратары, навукоўцы, работнікі асветы, грамадскія і культурныя дзеячы Беларусі. 1794–1991». Усяго сабраныя звесткі пра 20 тысяч ахвяраў. Леанід Маракоў — аўтар доследу «Ахвяры і карнікі», асобна выйшла кніга звестак пра рэпрэсаваных у Беларусі праваслаўных святароў. У 2014 годзе выйшла ягоная манаграфія «Галоўная вуліца Мінска. 1880–1940».

Паводле Радыё Свабода