Студэнты хочуць правесці ў Мінску марш салідарнасці

Студэнты збіраюцца правесці ў Мінску марш "Каханне і салідарнасць". Пра гэтую падзею стала вядома з сацыяльных сетак.

"Гэта наша магчымасць паказаць адміністрацыі ўніверсітэтаў і міністэрству адукацыі, што мы патрабуем рэальных рэформаў у сферы вышэйшай адукацыі, а не спробаў прыкрыць свае няўдачы "паборамі і штрафамі"... Мы выступаем за паўнавартаснае і роўнае ўключэнне ў кіраванне ўніверсітэтам ўсіх трох бакоў: адміністрацыя, выкладчыкі і студэнты", – напісана ў студэнцкай заяве.

Раней студэнты БДУ сабралі 2,5 тысячы подпісаў, каб адміністрацыя не ўводзіла плату за пераздачы. Але новыя дадатковыя паслугі ва ўніверсітэце ўсё ж увялі. Пазней да студэнтаў БДУ далучыліся студэнты Беларускага дзяржаўнага педагагічнага ўніверсітэта імя Максіма Танка.

Марш плануецца правесці 2 снежня. Час і месца збору паведамяць пазней. Ці звярталіся арганізатары па дазвол на акцыю да гарадскіх уладаў, пакуль невядома, паведамляе сайт Еўрабеларусі.