Удзельнікі вечарыны салідарнасці з Украінай падтрымалі віцебскіх журналістаў

Напрыканцы сустрэчы, якая ладзілася ў гонар новага ўкраінскага свята Дня годнасці і Свабоды 21 лістапада, яе ўдзельнікі сфатаграфаваліся на фоне малюнка, дзе зробленая з газеты птушка вырываецца з клеткі на волю.

Такім чынам сябры Камітэта салідарнасці з Украінай выказалі сваю салідарнасць з віцебскімі журналістамі, на якіх склалі адміністрацыйныя пратаколы за тое, што яны сфатаграфаваліся на фоне графіці, прысвечанага тэме свабоды СМІ.

Нагадаем, Зміцер Казакевіч, Кастусь Мардвінаў, Таццяна Севярынец, Алена Шабуня сфатаграфаваліся на фоне малюнка на сцяне будынка – выявы трох жалезных клетак, з якіх вырываецца зробленая з газеты птушка. Некаторыя таксама фатаграфаваліся, трымаючы ў руках папяровых птушак або клеткі. Фотаздымкі трапілі ў сацыяльныя сеткі і атрымалі розгалас. На удзельнікаў фотасесіі склалі адміністрацыйныя пратаколы. Цяпер іх чакаюць суды.