Якая мадэль мадэрнізацыі патрэбна беларускай адукацыі?

Незалежныя студэнцкія арганізацыі разам з Грамадскім  Балонскім камітэтам,  Камітэтам «Салідарнасьць”, Офісам па правах людзей з інваліднасцю і Таварыствам беларускай школы ладзяць 17 снежня канферэнцыю:

«МАДЭРНІЗАЦЫЯ АДУКАЦЫІ: ВЫКЛІКІ І ПЕРСПЕКТЫВЫ”.

Якія выклікі паўсталі перад сістэмай адукацыі Беларусі, якая якасць  сённяшняй адукацыйнай палітыкі, ці  адпавядаюць стратэгіі развіцця сярэдняй і вышэйшай школы нашай краіны актуальным патрэбам і нацыянальна-культурнай перспектыве беларускага народу?

Працаўнікам асветнай сферы, экспертам, грамадскім арганізацыям, якія адстойваюць інтарэсы зацікаўленых груп насельніцтва нашай краіны, прапануюць абмеркаваць гэтыя тэмы падчас канферэнцыі.

4 снежня 2013 г. прайшлі парламенцкія слуханні на тэму «Удасканаленне заканадаўчай базы нацыянальнай сістэмы адукацыі ў сучасных умовах». Але ці адпавядаюць выказаныя ў парламенце прапановы сучаснай мадэлі мадэрнізацыі адукацыі?

Удзельнікі канферэнцыі  абмяркуюць магчымасці і механізмы пашырэння грамадскага ўдзелу ў кіраванні адукацыяй, адказнасць грамадства за яе якасць, рэальнае забеспячэнне права на адукацыю па-беларуску на ўсіх узроўнях, справядлівы доступ да вышэйшай адукацыі розных груп грамадзян, у тым ліку людзей з інваліднасю, асоб старэйшага ўзросту ды інш. Спецыяльная сесія будзе прысвечана ўдзелу студэнтаў у прыняцці рашэнняў у жыцці ВНУ .

Вынікам канферэнцыі павінны стаць узгодненыя прапановы наконт развіцця заканадаўчай базы нацыянальнай сістэмы адукацыі, якія адпавядаюць грамадскаму запыту на інтэграцыю ў еўрапейскую адукацыйную прастору.

Усіх зацікаўленых запрашаюць  прыняць удзел ў канферэнцыі.  Яна адбудзецца 17 снежня 2013 з 12.00 да 18.00 у Мінску  ў Гатэлі Краўн Плаза, зала Прынцэс 2 ( вул. Кірава, 13)