Яшчэ двое ўдзельнікаў акцыі памяці Міхала Жызнеўскага выйшлі на волю (ФОТА)

Яўген Батура і Мікола Колас, удзельнікі акцыі памяці Міхала Жызнеўскага ды іншых загінулых герояў Майдана, 1-га лютага пасля дзесяцісуткавага адміністрацыйнага арышту выйшлі на свабоду. 

Вызваленне праходзіла па адпрацаванай супрацоўнікамі міліцыі схеме. Хлопцаў блізу 19 гадзін (за 2 з паловай гадзіны да ўстаноўленага законам часу) вывезлі з Цэнтра ізаляцыі правапарушальнікаў Мінгарвыканакама, што месціцца на завулку Акрэсціна. Гэта рабілася, каб не дапусціць рэзананснай сустрэчы сядзельцаў сябрамі і паплечнікамі каля брамы ЦІП. Як і пры вызваленні Вольгі Мікалайчык 27 студзеня, ахоўнікі ізалятара не прызнаваліся, куды адвезлі вызваленых удзельнікаў акцыі салідарнасці з Украінай і настойліва прасілі разысціся. Для запалохвання сустракаючых нават прыехала транспартная машына міліцыі, якую ў народзе называюць МАЗ-аўтазак.

Вызваленых Яўгена Батуру і Міколу Коласа, як выявілася, адвезлі ў РУУС Цэнтральнага раёну, дзе яны і даседзелі некалькі гадзін вызначанага судом арышту. Менавіта туды і праз некаторы час і паехалі сябры і аднадумцы, каб паціснуць руку і перадаць цёплыя словы падтрымкі вызваленым маладзёнам. Сярод сустракаючых былі Валерыя Чарнаморцава, Ніна Багінская, Леанід Кулакоў, Кацярына Садоўская ды іншыя.

Нагадаем, пяцёра ўдзельнікаў акцыі памяці Міхаіла Жызнеўскага 22 студзеня былі пакараныя суткамі адміністратыўнага арышту, што выклікала абурэнне нават кіраўніка дзяржавы Аляксандра Лукашэнкі. Вольга Мікалайчык, Яўген Батура і Мікола Колас ужо на волі. Максім Вінярскі і Алесь Макаеў, якім далі па 15 сутак арышту, вызваляюцца 6 лютага.

Ахоўнікі ЦІП просяць сустракаючых  разысціся

Ніна Багінская дае інтэрв'ю Белсату

Сустрэча вызваленых каля РУУС Цэнтральнага раёна